Recebimento estudantil a Feijoo na USC

Dezembro 2008

Desta volta os médios tiram para abaixo. Fôrom mais dumha dúzia os e as jovens que, desde dentro e desde fora do Salom de Actos da Faculdade de Políticas da USC, increpárom o presidente do PP da Galiza, Feijoo, logo a seguir à sua entrada na faculdade para ministrar umha palestra num acto organizado por umha entidade estudantil fantasma e promovido realmente polo professorado da direita espanhola na USC. Mais umha vez, os ultras a soldo da Conselharia de Educaçom quigérom utilizar a Universidade como umha passarela mediática para mostrar as suas estrelas: ora San Gil, ora Feijoo.
 
De novo umha escusa: 'Que é a universidade para ti?' como título da palestra, para apresentar o candidato da extrema-direita espanhola à Junta de Galiza. Ao longo do acto estendeu-se com consideraçons da triste vida política do parlamentinho e as suas desavinças com PSOE e BNG para animar a sua tropa, envalentonada ante a dimensom dum acto que presenciárom mais de 150 pessoas, na sua imensa maioria jovens vinculados ao Partido Popular, e vindos de todos os recunchos da Galiza para a ocasiom.
 
Com um espectacular retraso de quase umha hora sobre o horário anunciado, Feijoo tomou a palavra após as intervençons dum cachorro do fanatismo espanholista e da encantadíssima decana da faculdade. Rapidamente se fôrom erguendo jovens com cartazes na mao, quem durante mais de meia hora se manteriam em pé, apoiados desde fora por companheir@s que nom pudérom aceder ou que se somárom ao acto interessad@s polo rebúmbio que se montava. Durante esse tempo, berrárom consignas como "Fascista", ""Fora o PP da USC" ou "Torturador", em clara mençom às responsabilidades do PP na violência estatal e internacional. Ao cabo, abandonariam o salom coreando "Aqui está, aqui se vê, o estudantado galego em pé".
 
O estudantado da esquerda independentista respondeu com umha intensa agitaçom que cobriu o prédio com pintadas e cartazes vários ambientando a cita, e denunciando mais umha vez que nom queremos elementos fascistas enturvando a quotidianeidade dumha Universidade seriamente afectada polas políticas mercantilistas do Processo de Bolonha.
 
Negamo-nos a entrar nos falsos debates sobre liberdade de expressom quando o que realmente está em jogo é precisamente isso: a capacidade do alunado para se organizar e erguer a voz na escola, sem medo à repressom nem limitaçons importadas das mesmas instituiçons que arruinam o ensino público, nos condenam à precariedade em todas as suas manifestaçons académicas e formativas, e som cúmplices do terrorismo patronal.
 
Estamos orgulhosos e orgulhosas de impedir o livre desenvolvimento de actos que, contra o que promocionam os media do sistema, nom constituem exemplo algum de normal desenvolvimento dumha universidade. Ao contrário, som a imagem mais evidente da sua parasitaçom por parte de agentes espanholistas que agem a diário contra a nossa identidade nacional, contra os direitos individuais e colectivos das pessoas e dos Povos do mundo, e contra toda forma de superaçom do extermínio capitalista.
 
ORGANIZA-TE E LUITA COM O ESTUDANTADO DA ESQUERDA INDEPENDENTISTA!
É TEMPO DE AGIR!