Concentraçom no Toral

Fevereiro 2008

A Assembleia Geral de Estudantes convocou para hoje, como anunciamos dias atrás, umha rolda de imprensa onde se deu leitura a um texto consensuado nas duas últimas reunions extraordinárias sobre a situaçom de perseguiçom ao estudantado.

Em particular, vincou-se a petiçom de que a Decana de Económicas seja expulsa, e que se depurem as responsabilidades pola malheira, com armas nom regulamentárias incluidas, por parte de polícias nom uniformados na nossa Universidade.

No mesmo lugar em que decorreu a protesta contra a visita de San Gil há já duas semanas, na entrada da Faculdade de Económicas e Empresariais, umha vintena de jovens acudírom ao breve encontro com alguns meios de comunicaçom. Após a leitura do manifesto, em que se recorda que duas das pessoas denunciadas graças aos labores de investigaçom da Decana de Económicas nem tam sequer estavam presentes aquele dia, informou-se da recolhida, em apenas três dias transcorridos desde a Assembleia Geral, de umhas poucas dezenas de assinaturas de professorado e Pessoal de Administraçom e Serviços (PAS), apoiando um texto de repulsa polo acontecido.

A campanha de recolhida de assinaturas continuará, à espera de que podam ser utilizadas como defesa da comunidade universitária perante eventuais relançamentos da agressom institucional ou mediática contra o estudantado.

Concentraçom

Os actos convocados por enquanto pola Assembleia Geral rematam amanhá com umha concentraçom estudantil na Praça do Toral, a partir das 20 horas do serám. A militáncia da organizaçom AGIR participará na mesma, e apelamos amigos/as, simpatizantes e companheiros/as a fazê-lo para acreditar a unidade em momentos de criminalizaçom.